LAOAG CITY – Naikabilen ni dati Pakistani Prime Minister Imran Khan iti ospital iti ciudad ti Islamabad a kabisera ti Pakistan, kalpasan dagiti reklamo mainaig iti saan a nasayaat a sasaaden ti salun-at na.
Ni Khan ket nakabalud iti Adiala Jail ken naipan iti Shifa International Hospital babaen ti naiget a seguridad.
Ti nasao nga addang ket naipatungpal kalpasan ti pammilin ti Korte Suprema iti Pakistan tapno naan-anay a maeksamen dagiti doktor ti salun-at ti dati a Prime minister.
Ibilang met ti dati a prime minister a daytoy ti kapintasan nga addang ti korte para kenkuana sipud naipisok iti pagbaludan idi 2023 gapu iti kaso a panagkunniber, nga inpetteng ni Khan nga adda ti maris pulitika na.
Iti pannakaikabil ni Khan iti Shifa International Hospital ket adda dagiti nakapalawlaw a pulis ken barikada.
Naiget met ti pammilin ti Korte Suprema a saan a mangipatungpal ti press conference ni Khan iti ruwar ti ospital.
