LAOAG CITY – Nakita ti maysa a nalamiisen a bangkay ti lalaki iti Brgy. Maglaoi Centro iti ili ti Currimao.
Segun ken ni P/Capt. Melvin Soriano, Hepe ti Currimao Municipal Police Station, nabigbig ti biktima a ni Bryan Dumaguing y Baybado, agtawen ti 35, awanan asawa, tricycle driver ken residente ti Brgy. Maglaoi Centro iti nasao nga ili.
Inbatadna a basar iti inwayatda nga imbestigasion, kabayatan a magmagna ni Jericho Ortega y Dalagan, agtawen ti 26, awanan asawa ken residente ti nasao a barangay a naggapu iti pagiinoman iti agarup 2:10 ti parbangon ket nakitana ti biktima nga awanen ti biagna.
Inlawlawagna a posible a natulid ti biktima iti nagluganna a bisikleta ken naitupa ti rupana iti kalsada gapu iti kinabartekna.
Mainaig iti daytoy, basar iti pannakisarsaritada ken ni Edwin Ortega y Barbosa, agtawen ti 40, naasawaan, tricycle driver, residente ti nasao met laeng a barangay ken kainoman ti biktima a nagiinomda kaduana ti biktima ken agarup 10:20 ti rabii idi nagawiden ti biktima iti pagtaenganda.
Naideklara a natay ti biktima babaen ken ni Dr. Addielou Fidelfio Abad, Municipal Health Officer gapu iti Traumatic Brain Injury ken awan ti nakita a pakalasinan ti foul play iti insidente.
Kabayatanna, naammoan nga awan ti aniaman a sakit a sagsagabaen ti biktima ngem maipagarup a masansan nga agbarbartek.
