LAOAG CITY – Ad-adda pay nga agbalin a pursigido dagiti atleta gapu ta maipaayan ti cash incentives dagiti makagun-od ti medalya iti 2026 Palarong Pambansa a maisaysayangkat idiay Agusan del Sur.
Nangilatang ti Philippine Sports Commission (PSC) ti P10 milyon para kadagiti mangabak ti medalya iti nasao a multi-sporting event.
Daytoy ket basar iti pammilin ni Presidente Ferdinand Marcos Jr. tapno ad-adda pay a papigsaen ti national grassroots sports development program.
Basar iti sistema, maipaayan dagiti gold medalists ti P5,000 a premio idinto a dagiti silver medalists ket maikkan ti P3,000 ken P2,000 met para kadagiti bronze medalists.
Inbatad ni Philippine Sports Commission Chairman Patrick Gregorio a dakkel a tulong daytoy para kadagiti atelta tapno manayonan ti pundoda para iti training.
Maysa ti Palarong Pambansa kadagiti pangal-alaan kadagiti nalalatak nga atleta iti pagilian.
Maysa a produkto daytoy ni gymnast Carlos Edriel Yulo a nakagun-od ti dua a balitok a medalya iti 2024 Olympic Games idiay Paris, France.
Gapu iti daytoy, naruay nga atleta ti makibinbinnalubal ti Palarong Pambansa tapno agbalin a paset ti national team iti masangoanan.
Makabinnulig ti Philippine Sports Commission iti panangipaay ti Philippine Amusement and Gaming Corporation (PAGCOR) no sadinno isu ti paggapoan ti pundo.
