LAOAG CITY – Natay ti nangiturong ti motorsiklo kalpasan a naidungpar iti poste ti kuriente iti Batac Paoay Road iti Brgy. Tabug iti siudad ti Batac.
Ti biktima a nangiturong ti Black Yamaha Aerox ket agtawen ti 30, awanan asawa, Call Center agent ken residente ti Brgy. Ablan iti siudad ti Batac.
Ti nangiturong ti Blue Euro 125 ket agtawen ti 44, naasawaan, operator ti bum truck ken residente ti Atioc San Miguel, Tarlac ken ti kinalubbona ket agtawen ti 48 ken residente ti Brgy. Tabug iti siudad ti Batac.
Ti akinkukua met ti tricycle a naka-parking nga Honda TMX 155 ket agtawen ti 29, awanan asawa, Tricycle Driver ken residente ti Brgy. Mabaleng iti siudad ti Batac.
Basar iti Batac City Police Station, kabayatan a dumaldalyasat ti biktima a nangiturong ti motorsiklo nga agturong nga agpa-daya ket nag-overtake daytoy a nangitunda ti panagdinnungparda ti maysa pay a motorsiklo nga agturong met nga agpa-daya.
Gapu iti daytoy, napukawan ti kontrol ti manibela a nangitunda pay ti pannakaidungparna iti naka-parking a tricycle agingga a nagderderetso a naidungpar iti poste ti kuriente.
Naammoan a napukawan met ti kontrol ti manibela ti maysa a nakamotorsiklo a nangitunda ti pannakatulidda iti kalsada.
Mainaig iti daytoy, nagsagaba ti nakana a sugat ti biktima idinto a nasugatan met iti nagduduma a paset ti bagi ti kinalubbon ti maysa pay a motorsikloa dagus dagitoy a naitaray iti Mariano Marcos Memorial Hospital and Medical Center iti siudad ti Batac.
Kabayatanna, naideklarar a dead on arrival ti biktima babaen ken ni attending Physician Dr. Ulysses Gaygay.
