LAOAG CITY – Nagsagaba ti nakana a sugat ti maysa a motorista kalpasan a naipisok iti matartarimaan a drainage canal iti Brgy. 20 ditoy siudad ti Laoag.
Basar iti impormasion, arig naawanan pay ti puot ti biktima gapu iti napasamak nga aksidente rason a maikagkagumaan ti pannakailippas ti nasao a proyekto tapno awanen ti sumublat a madesgrasia.
Mainaig iti daytoy, segun ken ni Brgy. Kagawad Charles Gagarin iti nasao a barangay a tulunganda ti maseknan maipapan iti pannakatamingna.
Inlawlawagna a saan pay a nalpas ti nasao a proyekto ti barangayda gapu ta saan nga umdas ti pundo a nailatang para iti daytoy.
Nupay kasta, inpasingkedna a maikkan ti warning signages iti lugar a nakapasamakan ti aksidente tapno maliklikan nga adda ti mailaw-an a maipisok iti drainage canal.
Kabayatanna, bayat ti panagturong ti News Team ti Bombo Radyo Laoag iti nasao a barangay no sadino ket inpetteng ni Brgy. Chairwoman Marilyn Dancel a saan a basol ti barangayda ti napasamak iti biktima.
Iti agdama, bayat a maisursurat daytoy a damag ket ikarkarigatan ti Bombo Radyo Laoag a maalaan ti naan-anay a komento ti maseknan a Kapitana tapno masungbatan dagiti sumagmamano a saludsod kenkuana ngem saan met a nasayaat ti pannakisangona iti News Team.
