LAOAG CITY – Natay ti nakamotorsiklo kalpasan a nadisgrasia iti Barangay Camangaan ditoy siudad ti Laoag.
Nabigbig ti biktima a ni Mark Angelo Macabangon, agtawen ti 24, awanan asawa ken residente idiay Lasam, Cagayan.
Basar iti inisyal nga imbestigasion ti Laoag City Police Station, kabayatan a dumaldalyasat ti driver ti motorsiklo nga agturong nga agpa-daya ket kellaat daytoy a napukawan ti kontrol ti manibela a nangitunda ti pannakaidungparna iti arko iti nasao a barangay.
Gapu iti daytoy, nagsagaba ti sugat iti nagduduma a paset ti bagi ti biktima nga insigida a naitaray iti kaasitgan nga ospital ngem pimmusay kabayatan a matamtaming.
Rumrummuar a nabartek ti biktima idi napasamak ti disgrasia ken naggapu daytoy iti pagtrabahoanna iti maysa a dakkel a mall ditoy siudad ti Laoag.
Naammoan a nakasuot ti protective helmet ken high visibility vest ti biktima idi napasamak ti insidente.
