LAOAG CITY – Natay ti maysa nga estudiante kalpasan a natnag ti naglugananna a motorsiklo iti irrigation canal iti Sitio San Fernando iti Brgy. San Marcelino iti ili ti Dingras.
Nabigbig ti biktima a ni Jay Mark Gregorio y Balicao, agtawen iti 21 ken residente ti Sitio Nagmarcaan iti Brgy. San Marcelino iti nasao nga ili.
Basar iti Dingras Municipal Police Station, agarup alas 3:30 ti parbangon ita nga aldaw, kabayatan nga agbanbanniit ti tukak ni Norbert Jacinto y Quitoras, agtawen iti 50, naasawaan, mannalon ken residente ti Sitio San Fernando iti nasao a barangay ket nakitana ti awanen ti biagna a biktima nga adda iti irrigation canal pakairamanan ti naglugananna a motorsiklo.
Maibasar kadagiti otoridad, agarup alas singko ti malem idi Setiembre 28, ti biktima ket napan nagatendar iti maysa a birthday party ken nakiinom daytoy iti Sitio Casannicolasan iti nasao a barangay ken nagtalaw iti alas dos ti parbangon ti Setiembre 29.
Kabayatanna, basar iti medical examination ni Dr. Susan Calaoagan, Municipal Health Officer iti ili ti Dingras ket nagsagaba ti sugat iti nagduduma a paset ti bagi kangrunaanna iti ulo ti biktima no sadinno a posible a saan a nagusar ti protective helmet ti biktima idi napasamak ti desgrasia.
