LAOAG CITY – Nakurkurang ngem sangagasut dagiti maala nga agbalin a benepisiario ti Government Internship Program wenno GIP a pagbinnuligan ti Department of Labor and Employment ken ti gobierno probinsial ti Ilocos Norte babaen iti Public Employment Service Office wenno PESO.
Segun ken ni Mrs. Anne Marie Lizette B. Atuan, manager ti Public Employment Service Office ti gobierno probinsial, mannarimaan pay laeng ti panagaw-awatda ti aplikasyon dagiti interesado a makipaset iti sabali pay a bansada ti nasao a programa.
Inbatadna a nagngudo itay napalabas a bulan ti Marso dagiti nagbalin a benepisiario ti umuna a bansada a nangrugi idi bulan ti Oktubre.
Inbunannagna nga apaman a makumpleto ti naituding a bilang a maala para iti sumaruno a bansada ti nasao programa ket dagus manen dagitoy a maideploy kadagiti nadumaduma a pangopisinaan ti gobierno probinsial.
Immun-unan nga inpakaammo ni Atuan a sumagmamano kadagiti nanggundaway ti nasao a programa ti naala kadagiti nagserbianda a pangopisinaan ti gobierno probinsial nga agserbi a Job Order wenno JO iti gobierno probinsial.
Kunana a daytoy ti mangipamatmat iti kinapintas ti nasao a programa gapu ta no makita ti kinagaget ken kinalaing dagiti benepisiario ket maikkanda ti gundaway nga agtrabaho iti gobierno.
