LAOAG CITY – Kinontra ti National Citizens’ Movement for Free Elections (Namfrel) ti gakat a pannakaitatan ti Barangay ken Sangguniang Kabataan (BSKE) elections a naikeddeng inton Nobiembre 2.
Iti maysa a rakurak, inbatad ti election watchdog a ti pannakaitantan ti local election ket mangipakpakita ti naiget a pangta kadagiti pundasion ti demokrasia iti pagilian.
Segun iti National Citizens’ Movement for Free Elections (Namfrel), saan a discretionary events wenno opisial nga aktibidad ti Barangay ken Sangguniang Kabataan tapno maitantantan para iti pakabenepisiaran dagiti adda ti takem.
Inpetteng pay ti grupo a ti panang-divert dagiti pundo para iti panagsagsagana ti local eletions para iti sabali pay a serbisio ti gobierno ket maysa nga institutional sabotage.
Kunana a ti panangikkat ti resources ti COMELEC tapno maitantan ti eleksion ket maysa a panaglabsing ti Article VI, Section 25(5) iti konstitusion no sadinno a maipawil ti panagiyakar ti budgetary funds.
Inpaganetget ti Namfrel a masapul a maikkan ti karbengan ti tunggal botante nga agpili ti Barangay ken SK officials ti regular ken awan ti pannakaitantanna.
