LAOAG CITY – Ti panaggun-od ni Vice President Sara Duterte ti nangato a rating iti survey ket saan a rason tapno saan nga ituloy ti panangtingiting kenkuana iti Senate Impeachment Court.
Inrakurak daytoy ni House Prosecutor ken Bicol Saro Rep. Terry Ridon kalpasan a nakaala ti nangato a rating ni Vice President Duterte iti Social Weather Stations (SWS) survey a naiwayat idi Hunio 20 agingga 29 wenno sakbay ti impeachment trial.
Inpetteng ni Ridon, nakailanad iti Konstitusion ti panagsungbat kadagiti nangangato nga opisial ti pagilian a napaay iti inpaay a talek dagiti umili ken nakaaramid ti panaglabsing iti linteg ken konstitusion.
Kuna ni Ridon, congratulations ken ni Vice President Sara gapu ta nangato ti naalana a satisfaction rating ngem tuloy latta ti impeachment trial.
