LAOAG CITY – Mamati ti Department of Agriculture (DA) a temporario laeng ti nangato a presio ti baboy ken maikonsiderar a masolbar daytoy kadagiti sumarsaruno nga aldaw nangruna no addan ti commercial a bakuna para iti African Swine Fever (ASF).
Inbatad ni Agriculture Secretary Francisco Tiu Laurel Jr. nagtulag dagiti producer ti karne ti baboy, traders ken retailers nga i-review dagiti gastosenda iti gagem a makissayan ti presio ti karne ti baboy.
Inlawlawagna a pinaayabanna dagiti lider ti traders ken retailers tapno maammoan dagiti rason iti panagngato ti presio ti baboy ken ma-assess no kasapulan a mangikeddeng ken mangipatungpal ti Maximum Suggested Retail Price (MSRP) tapno mapalag-an ti mapaspasaran dagiti consumer.
Kuna ti sekretario a ti presio ti frozen import a karne ti baboy ket agdama nga adda iti P250 iti kada kilo idinto ti lokal a karne ket mailaklako iti sumurok P400 iti kada kilo.
