LAOAG CITY – Mapaspasaran ita dagiti Pilipino ti napigsa nga angin ken tudo gubuay iti Bagyo Jocelyn idiay United Kingdom.
Segun ken ni Bombo International News Correspondent Greg Pasalodos manipod iti United Kingdom, gapu iti napigsa nga angin ken mawaraswaras a panagtudo ket adda dagiti puon ti kayo ti natuwang ken natupakan dagiti sumagmamano a lugan a naka-parking kadagiti kalsada.
Malaksid iti daytoy, inbatadna nga adda dagiti lugan a marigatan ti panagbiyahe gapu ta adda dagiti kalsada a saan a madalyasatan gubuay kadagiti dadakkel a puon ti kayo a natulid a nagbalin a lapped iti panagdalyasat dagitoy.
Kunana nga iti agdama ket adda dagiti sumagmamano a residente ti napukawan ti suplay ti kuryente a saanda pay a masinunuo no inton ano ti pannakaisubli iti daytoy.
Gapu iti daytoy, adda dagiti sumagmamano a residente ti nagkamang kadagiti evacuation center tapno maka-charge dagiti cellphone-da a lowbat.
Immuna iti daytoy, nangiparuk-at ti United Kingdom ti flood warning iti dakkel a paset ti nasao a pagilian.
Kabayatanna, daytoy ti maikadua a bagyo iti uneg ti dua nga aldaw a makapaspasar ti United Kingdom.
Ti immuna a Bagyo Isha ket nagibati ti nalawa a panaglayos idiay Northern Ireland, Scotland ken England.
