LAOAG CITY – Inrakurak ni Atty. Domingo “Egon” Cayosa, dati a Presidente ti Integrated Bar of the Philippines a napinpintas no inyuray ti desision ti Korte Suprema mainaig iti motion for reconsideration sakbay ti panang-archive ti Senado iti impeachment case ni Vice President Sara Duterte.
Segun kenkuana, daytoy ket para iti “fairness” ken panangrespetar ti parliamentary courtesy ti House of Reprsentatives nangruna ket kabinnulig dagiti Senador dagiti Kongresista.
Inbatadna a kas maysa nga abugado ket kitkitaenda ti naiget a sursuroten a pagannurotan ti Korte Suprema kas maiyallubog iti Konstitusion.
Inlawlawagna a posible a sublianan dagiti Senador ti panang-archive-da iti impeachment case kontra iti Bise Presidente apaman a mabaliktad ti nagbalin a desision ti Korte Suprema.
Maipalagip a nagbutos ti 19 a kameng ti Senado a pabor a mai-archive ti Articles of Impeachment kontra ken ni Vice President Duterte idinto nga uppat ti nangkontra ken maysa ti nag-abstain.
Immuna iti daytoy, idi Hulio 25, 2025, nangiparuk-at ti desision ti Korte Suprema a nangideklarar a mailabsing iti Konstitusion ti impeachment complaint kontra ken ni Vice President Duterte.
