LAOAG CITY – Inpakaammo ni Bombo International News Correspondent Rene Ballenas manipud idiay New Jersey, USA nga adu ti bimmaliktad iti panangsuporta ken ni dati nga United States Pres. Donald Trump para iti mapaspasangasangan nga eleksion inton Nobiembre 5.
Inbatadna a naruay dagiti supporters ni Trump idi 2016 Elections ti nagbabawi a maminsan manen a suportaranda ita a 2024 Elections pakairamanan dagiti bilyonaryo a mangipapaay ti donasion kenkuana.
Inlawlawagna a dakkel ti posibilidadna a mangabak iti eleksion ni Vice Pres. Kamala Harris iti baet a babai isuna gapu ta saan a napintas ti panangiprisentar ni Trump dagiti isyu a napateg kadagiti Amerikano.
Kunana nga adda dagiti banag a nangdadael iti imahe ni Trump iti publiko kabayatan ti panagtakemna kas Presidente ti Estados Unidos.
Mainaig iti daytoy, naammoan a ngimmato pay ti utang ti Amerika iti nasurok 3 a trilyon a dolyar iti babaen ti administrasionna.
Innayonna nga adu dagiti natalantan kabayatan ti umuna a pannakaisayangkat ti Democratic National Convention no sadinno napagsasaritaan ti maipanggep iti Universal Healthcare Law, immigration, boarder issues, gender equality ken dadduma pay.
