LAOAG CITY – Maproblemaan dagiti naruay a motorista iti Barangay 21 San Marcos iti ili ti Sarrat gapu kadagiti abut iti kalsada.
Segun ken ni Barangay Chairman Reynaldo Malaqui, adu dagiti motorista ti agrekreklamo gapu iti agdama a situasion ti nasao a kalsada.
Inbatadna a mangitunda pay ti nairot a trapiko gapu ta awan ti mangbayabay kadagiti dumalyasat a motorista.
Gapu iti daytoy, inbilin ni Kapitan Malaqui dagiti barangay tanod daytoy tapno temporario nga isuda pay laeng ti mangkita kadagiti motorista a dumalyasat iti nadakamat a kalsada.
Kunana nga addan ti dua a bulanen ti napalabas sipod idi rinugianda a tinubtob ti kalsada para iti pannakatarimaan iti daytoy.
Innayonna a naamak ti panagdalyasat dagiti motorista nangruna iti rabii gapu ta nasipnget iti lugar.
Kabayatanna, inpasingked ni Engr. Richmond Baligud, Project Inspector iti matartarimaan a kalsada a manayonan ti traffic signages ken silaw iti nasao a kalsada.
Immuna iti daytoy, adda ti naawat nga impormasion ti Bombo Radyo Laoag a maysa a motorista ti dandani a nadesgrasia gapu kadagiti abut iti kalsada.
