video courtesy of Bombo Ranie Dorilag
LAOAG CITY – Nauram dagiti nasurok 100 a goma ti truck iti lauden a gilbert bridge, paset ti Barangay Nangalisan-B ditoy ciudad ti Laoag.
Segun kenni Mrs. Marissa Arellano, caretaker iti nasao a lugar, mabalin a nairanta ti nasao a pannakauram dagiti goma ti truck nga adda iti karuruutan.
Kunana nga awan met ti nakariri na ken awan ti nadlaw da a nagturong iti nasao a lugar.
Naamoan a ti asideg ti nakapasamakan ti uram ket dalan dagiti tattao a mapan iti Nangalisan-A ditoy ciudad.
Immuna iti daytoy, kuna ni Arellano a nakita laengen ti anak na a mapupuuran dagitoy.
Inbatad na a gapo iti angin ket mabalin a nagramram ti uram isut gapo na a dimmakkel ti apoy.
Inpetteng na a saan da a nagpuur sakbay ti pannakauram dagiti narway a goma.
Kabayatanna, inbatad ni SFO1 Glenn Gabias iti Bureau of Fire Protection (BFP) ditoy ciudad ti Laoag nga inusar da ti blanketing technique wenno ti ginaburan da ti darat dagiti goma a napuuran.
Segun kenni Gabias, dua a truck ti BFP-Laoag ti nausar ken nagpatulong da pay iti construction firm nga akin-kukua kadagiti goma.
Kuna na a mabalin a dagiti naglabas ti nakaipurwak ti upos ti sigarilyo kadagiti daan a goma isut gapo na a napasamak ti uram.
Inlawlawag na a saan a nalaka a mapuuran ti goma ngem gapo iti tikag wenno namaga nga nga aglawlaw ket alisto a dimmakkel ti apoy.
