LAOAG CITY – Saan a maymaysa a solusion ti kasapulan tapno makissayan ti panaglayus iti intero a pagilian.
Inbatad ni Presidente Ferdinand Marcos Jr. nga agduduma ti problema iti kada lugar isut gapuna a masapul met nga iyataday iti kondision ken terrain dagitoy wenno dagiti flood control project ti gobierno.
Inladawan ti Presidente ti Cordillera Administrative Region no sadinno a kunana a narigrigat ti flood control gapu iti kabanbantayan a terrain.
Inpasigurado ti Presidente nga ad-adalen ti gobierno dagiti addang a mabalin nga aramiden iti kada lugar, babaen kadagiti panagadal nga agserbserbi a pagibasaran iti panangbukel ti flood control strategies.
Kagiddan daytoy, agtultuloy met ti dredging ken panangipatungpal kadagiti flood control facility a nabayagen a saan a maus-usar kas paset ti nalawlawa nga addang kontra iti panaglayus.
