LAOAG CITY – Umabot ti nasurok sangaribo a delegado ti pasangbayen ti probinsya para iti National Convention ti Association of Tourism Officers of the Philippines a mangrugi ita nga aldaw Oktubre 2, agingga iti Oktubre 5 ita a tawen.
Daytoy ti inbatad ni Mr. Ianree Racquel, Provincial Tourism Officer ditoy probinsya.
Segun kenni Racquel, dagiti delegado ket naggapo iti nagduduma a lokal a gobierno iti intero a Pilipinas.
Maiyuswat pay ti welcome dinner nga idaulwan ti gobierno ti ciudad ti Laoag ken ditoy a maiserbi dagiti classic ilokano food malaksid laeng ti parada intono malem, oras ti alas-kwatro.
Mainaig iti daytoy, kuna ni Racquel a bumisita dagiti delegado kadagiti tourism spot ti nagduduma nga ili kas iti Hydro Power Plant idiay ili ti Pagudpud, Windmill, pakairamanan ti Nueva Era, Solsona, San Nicolas, Batac, Paoay ken Dumalneg.
Naamoan a saan a makaumay ni Tourism Sec. Bernadette Romulo-Puyat ngem adda ti mangibagi kenkuana.
Ti tema ti nasao nga aktibidad ket “Tourism and Jobs, A Better Future for All”.
