LAOAG CITY – Umabot iti 510 nga ektarya iti kataltalonan a namulaan ti pagay ken agbalor ti 23 a milyon a pisos dagiti nadadael iti ili ti San Nicolas kalpasan ti iduduprak ti Bagyo Neneng.
Daytoy ti inbatad ni Ms. Rian Simon, mangidadaulo ti Municipal Disaster Risk Reduction and Management Office iti ili ti San Nicolas.
Segun kenni Simon, umabot met iti 16 nga ektarya ti naapektaran kadagiti namulaan ti mais, idinto nga iti high value crops kas iti tarong ket lima nga ektara ken agbalor ti 20 a ribo a pisos, idinto nga adda ti 25 nga agsabsabongen a mangga ti naperdi ken agbalor ti 50 a ribo a pisos.
Mainaig iti daytoy, kunana nga ada met ti 90 a pagtaengan iti nagduduma a barangay ti sinerrek ti danom idi kalman ken adda ti tallo a pamilya ti naibakwit.
Naamoan nga adda metten ti 63 a family food packs ti naibunongen ken agtultuloy pay daytoy. Kabayatanna, nagyaman ni Simon gapo ta awan ti naireport a natay, napukaw wenno nasugatan kabayatan ti iduduprak ti Bagyo Neneng.
