LAOAG CITY – Adda ti pakabuklan a 6,224 a pagadalan iti nagduduma a paset ti Mindanao ti naapektaran ti magnitude 7.8 a gingined.
Inbatad ti Department of Education (DepEd) a karaman kadagiti apektado a lugar ket dagiti rehiyon ti Zamboanga Peninsula, Northern Mindanao, Davao Region, Soccsksargen, ken Caraga.
Malaksid kadagiti pagadalan, mapatta-patta a 3.2 milyon nga agad-adal ken nasurok a 128,000 a mangisursuro ken dadduma pay nga school personnel ti naapektaran ti nasao a gingined.
Gapu iti daytoy, inrakurak ni Department of Education Secretary Sonny Angara ti pannakasuspenso dagiti klase iti amin a lebel kadagiti naapektaran a lugar agingga a mangiparuk-at ti baro nga abiso ti nasao a departamento.
Kuna ni Angara a gagem ti nasao nga addang a maipasigurado ti kinatalged ken seguridad dagiti agad-adal, mangisursuro ken dadduma pay nga agpapaay kadagiti pagadalan.
Segun pay ken ni Angara, nakaipatuluden ti Department of Education kadagiti structural engineer tapno mangiyuswat ti damage assessment kadagiti pagadalan ken mangipaay ti kasapulan a suporta kadagiti regional team.
Pinalubusan met ti ahensya ti panangusar ti Maintenance and Other Operating Expenses (MOOE) kadagiti pagadalan para iti dagus a pannakatarimaan dagiti nadadael a pasilidad nga agbalor agingga iti P50,000.
Kabayatanna, inpasigurado ti Department of Education nga adda ti nailatang a sabali a pondo ken emergency resources para iti pannakatarimaan ken rehabilitasyon a kasapulan ti dakdakkel a magastos.
Binilin metten ni Angara ti amin a pagadalan a naiget nga ipatungpal dagiti addang iti panagsagaba kontra iti gingined, karaman ti panangsurot iti evacuation procedures ken regular a panangiyuswat ti earthquake drills tapno mapagtalinaed ti kinasagana ti sibubukel nga school community iti aniaman a didigra.
Kabayatanna, umaboten iti 31 a tattao idinto a nasurok a maysa dosena dagiti mapukpukaw kalpasan ti insidente.
