LAOAG CITY – Dumanonen iti nasurok dua a ribu dagiti naarestar nga agisaysayangkat ti tignay-protesta kadagiti nagduduma nga unibersidad iti intero nga United States of America.
Segun ken ni Bombo International News Correspondent Ray Villanueva manipod idiay California, itay alas tres ti parbangon ita nga aldaw ket nabara a linappedan ti Los Angeles Police District, University of California Los Angeles ken California Highway Patrol dagiti Palestinian demonstrators iti University of California Los Angeles no sadino nasurok duagasut ti naarestar kadagitoy.
Inbatadna a dagiti pulis ket nagaramat ti pepper spray, tear gas, fire on the air ken puersa a pannakaposas dagiti agarup 500 a nakipaset iti tignay-protesta.
Inlawlawagna a nupay man timmalawda itay alas sais ti bigat ket nagpangtada nga agsubli iti University of California Los Angeles tapno itultuloyda nga agiwayat ti tignay-protesta agingga nga awan ti tignay ti unibersidad ken ti White House.
Kunana nga ikkis dagiti Palestinian demonstrators ti panagsardeng ti gubat iti nagbaetan ti Israel ken Palestine iti Gaza no sadino mamatida a ti Estados Unidos ti kangrunaan a mangsupsuporta ken mangipapaay kadagiti armas iti Israel.
Mainaig iti daytoy, inpalgakna a nakanselar ti klase mangrugi ita nga aldaw iti intero nga University of California Los Angeles ken saanen a matuloy ti Commencement Exercises a mangrugi koma inton Mayo 5.
Iti agdama, nakarikep amin dagiti entrance iti nasao a pagadalan no sadino ket naiget a saan a mapalubusan a makastrek dagiti estudiante, mangisursuro, sibilyan pakairamanan dagiti kameng ti Media.
