LAOAG CITY – Umaboten iti nasurok dua a ribo a pamilya wenno 11 a ribo nga indibidual ti apektado ti Bagyo Egay iti intero a Rehiyon Uno.
Segun kenni Ms. Bernadette Abad, ti Civil Defense Officer II iti Office of the Civil Defense Region 1, umabot iti 208 a pamilya wenno 622 nga indibidual ti adda kadagiti evacuation center iti intero a rehiyon.
Inbatad na nga iti inisyal nga impormasyon a naipadanon iti opisina da, adda dagiti pagtaengan ken establishimento ti nadadael idinto nga awan pay ti naireport no adda ti nadadael iti sektor ti agrikultura.
Nasuspenso met ti trabaho kadagiti opisina ti gobierno iti intero a Rehiyon gapo pay laeng iti Bagyo.
Mainaig iti daytoy, kunana nga iberberipikar da pay leng no Disaster Related Incident ti rason ti naidanon kadakuada nga adda ti maysa nga indibidual ti natay iti probinsya ti Ilocos Sur.
Iti agdama ket adda iti babaen ti Red Alert status ti Regional Disaster Risk Reduction and Management Office ken nakasagana dagiti personnel no kasapulan ti augmentation kadagiti nagduduma a probinsya.
