LAOAG CITY – Inpakammo ni Mr. Jhon Rey Salud, ti presidente ti North Main Canal Irrigators Association iti ili ti Vintar a no saan a matarimaan iti kabiitan a panawen dagiti nadadael ken nagaburan a kanal gapo iti naglabas a bagyo ket posible a nasurok sangaribo nga ektarya ti kataltalonan ti maapektaran.
Segun kenni Salud, masapol a matarimaan dagitoy ken maiturong ti danom kadagiti kataltalonan tapno saan nga agsagaba dagiti mannalon.
Inbatad na pay a ti saan a nalpas a natarimaan kalpasan a nadadael gapo iti Bagyo Egay ket isu ti kangrunaan a naapektaran idi dimmuprak ti Bagyo Goring.
Kunana a kalpasan ti bagyo ken naireport da met iti lokal a gobierno, gobierno probinsya ken National Irrigation Administration ti sitwasyon da.
Inlawlawag na nga iti agdama, pagtutulagan da no kaano ti aldaw a mairugi ti panagtarimaan da dagiti naperdi.
Kabayatanna, kuna na pay nga ad-adalen ti National Irrigation Administration no anya ti remedy na iti nadadael a paset ti dam tapno saanen a maulit no adda ti sumangbay a kalamidad ken mausar a nasayaat.
