LAOAG CITY – Umaboten iti nasursuruk ngem uppat a billion a pisos ti balor dagiti nadaddadael iti isasaplit ti bagyo ompong ditoy Ilocos Norte.
Basar iti kaudian a naipadanon iti Provincial Disaster Risk Reduction Management and Resiliency Office itay ala una ita a malem kadakkelanen ti balor dagiti nadadael iti benneg ti infrastraktura nga immabot iti nasursurok ngem dua a billion a pisos.
Kabayatanna, nakurkurang ngem dua a bilion a pisos ti balor dagiti nadadael iti benneg ti agrikultura.
Nupay kasta, nagtalinaed a ti pagay ti kadakkelan ti balor iti nadadael nga agdagupen iti maysa a bilion 851 a million 530 ribu ken uppat a gasut ket maysa a pisos ken siam a pulo ket tallo a sentimos.
Sumarsaruno a kadakkelan ti balor ti nadadael ti “flood/river control projects” nga agdagupen iti maysa a bilion, 258 a million, 430 ribu a pisos.
Immun-una ngem iti daytoy, inrakurak ni Gob. Imee Marcos a kaaddoan kadagiti nadadael a proyekto infrastraktura ket manipud iti maikadua a distrito ti probinsia gapu ta kaaddoan kadagiti nadadael ket dagiti saan a naituloy a proyekto.
Iti agdama, maiyur-uray pay laeng ti tignay nga iyuswat dagiti maseknan nga ahensia kalpasan a naidanon dagitoy a problema bayat ti ibibisita ni Pres. Rodrigo Duterte ditoy Ilocos Norte itay kallabes.
