LAOAG CITY – Immulin iti siam a tattao ti natay gapu iti iduduprak ti Bagyo Carina.
Basar iti National Disaster Risk Reduction and Management Council (NDRRMC) nga adda ti dua a nasugatan ken maysa ti naipadamag a mapukpukaw.
Naammoan a dagiti pimmusay ket manipud iti Zamboanga Peninsula nga adda ti uppat, adda met ti dua iti Bangsamoro Autonomous Region in Muslim Mindanao (BARMM) ken saggaysa iti Northern Mindanao ken Davao Region.
Nabirukan pay ti maysa a baro a natay kalpasan a nalmes iti Infanta Bridge iti Barangay 96 ti Tondo, Manila.
Nakaapektar met kadagiti 179,744 a pamilia ti nasao a bagyo wenno katukad ti 866,483 nga indibidual.
Mapattapatta a dumanon iti P8.7 milyon ti balor iti nadadael iti benneg iti agrikultura iti Western Visayas, Zamboanga Peninsula, Northern Mindanao ken BARMM idinto a ti naipadamag a nadadael kadagiti imprastraktura ket dumanon iti P700,000 malaksid pay kadagiti balor a nadadael a pagtaengan a P2.5-M.
Innayon ti National Disaster Risk Reduction and Management Council a ti southwest monsoon ket nangigubuay ti napigsa a tudo kadagiti nagduduma a paset ti pagilian sipod pay idi Hulio 11 a nangdegdeg ti Bagyo Butchoy ken Carina.
Kabayatanna, nangipaay met ti Department of Social Welfare and Development (DSWD) ti P29-M a tulong kadagiti nagibakwit a naapektaran a pamilia.
