LAOAG CITY – Natay ti maysa a babai kalpasan a natagtagbat iti uneg a mismo ti balay na iti paset ti Barangay Nagsurot iti ili a Burgos.
Nabigbig ti biktima a ni Sheryl Ranay y Garcia, agtawen ti 39, addaan ti tallo nga annak ken residente metlaeng iti nasao a barangay.
Segun ken ni Police Corporal Mark Briones, imbestigador ti PNP-Burgos, naamoan da a kalpasan a nagsina ti biktima ken ti asawa na ket nakirelasyon iti maysa nga Amerikano.
Nupay kasta, nagsina da iti Amerikano ken iti agdama ket adda ti nobyo na a residente met laeng iti Barangay Nagsurot nga iti agdama ket manarimaan a kasarsarita ti PNP.
Kinumpirmaran ni Briones a nagsagaba ti biktima ti dua a tagbat iti teltel, ngato ti lapayag ken dua a tagbat iti rupa na.
Agtultuloy ti imbestigasyon dagiti otoridad iti nasao nga ili tapno maamoan ti motibo ti krimen ken ti kinatao ti suspek.
