LAOAG CITY – Natay ti maysa a lakay kalpasan a nagbekkel idiay Brgy. Escoda iti ili ti Marcos.
Nabigbig daytoy a ni Artemio Agoot y Cambut, agtawen ti 72, awanan ti asawa, mannalon ken residente iti nasao a barangay.
Segun ti imbestigasyon dagiti otoridad, kabayatan nga agay-ayam dagiti dua a menor de edad iti asideg ti balay ti biktima ket ditoy a nakita da ti lakay a nakabitin.
Gapo iti daytoy, dagus a nagpatulong dagiti agnagan ti Francisco Agoot, agtawen ti 48 ken ti Mylanie Agoot, agtawen ti 34, agpada a residente ti nasao a lugar.
Ni Francisco ti nangtagbat iti tali nga inusar ti biktima sakbay da nga intaray iti ospital ngem naideklara a dead on arrival.
Naamoan a nagusar ni Agoot ti tali a panangibitin ti bagi na iti mismo kusina ti balay na.
Awan met ti makita dagiti otoridad a foul play iti nasao nga insidente.
Rumrumwar a ti biktima ket maymaysan nga agnanaed ti lakay iti balay na.
