LAOAG CITY – Nakaawiden ditoy pagilian ti men’s national curling team.
Daytoy ket kalpasan a nagun-odda ti kaunaan a balitok a medalya ti Pilipinas iti 2025 Asian Winter Games idiay China.
Ti men’s curling team ket bukbuklen da Marc Angelo Pfister, Enrico Gabriel Pfister, Christian Patrick Haller, Alan Beat Frei ken Curling Winter Sports Association of the Philippines president Benjo Delarmente.
Nagbalin a naballigi ti national team idi abakenda iti finals ti South Korea iti iskor a 5-3.
Basar iti Philippine Sports Commission, sinabat isuda ni PSC chair Richard Bachmann, Commissioner Bong Coo ken Executive Director Paulo Francisco Tatad iti Ninoy Aquino International Airport Terminal 1.
