LAOAG CITY – Inbatad ni Mr. Edgar Ganal, ti Board Secretary ti Northern Ilocos Transport Group ditoy ciudad ti Laoag nga arigna saan da a marikna ti inaprubaran ti Land Transportation Franchising and Regulatory Board (LTFRB) a pagngatoan ti plete kadagiti pampubliko a transportasyon ditoy pagilyan.
Segun ken ni Ganal, no maipababa ti presyo dagiti produkto a petrolyo ket kalaingan na ti inaprubaran ti Land Transportation Franchising and Regulatory Board a 12 a pisos ti regular fare iti pampasahero a jeep.
Inpetteng na a gapu iti nangato a presyo ti krudo ken uray dagiti piyesa ti lugan ket arigna awan ti maitulong na kadakuada nga agpaspasada ti jeep ti nainayun a plete nga inaprubaran ti Land Transportation Franchising and Regulatory Board.
Innayon na nga agpapan ita ket awan pay ti naawat da a pakaammo manipod iti opisina ti Land Transportation Franchising and Regulatory Board mainaig iti daytoy a banag ken saanda pay a masinunuo no kaanu a mangrugi a maipatungpal ti nasao nga addang.
Mainaig iti daytoy, kuna ni Ganal a 20-30 % laeng ti nagngatoan ti mapaspastrek da no ikompara idi saan pay a nangrugi ti klase ken nagsubli dagiti estudyante iti pagadalan gapu ta dagiti sigud a saan nga agpaspasada a jeep ket nagsubli da metten isut gapuna nga immadon nga agpasada.
