LAOAG CITY – Iberberipikar ti National Bureau of Investigation (NBI) ti report a nakita ni Senador Ronald dela Rosa iti maysa a yate nga agturong iti saan pay a masinunuo a probinsia.
Inbatad ni National Bureau of Investigation Director Melvin Matibag a mabalin a gagem ti kastoy a report nga ulawen dagiti otoridad tapno arestaren ti Senador.
Daytoy ket iti baet ti sangsangoenna nga arrest warrant manipud iti International Criminal Court (ICC) nga adda ti pakainaiganna iti nagbalin a papelna iti nadara a war on drugs ti Duterte administration.
Kuna ni Matibag a mabalin nga ul-ulawenda laeng isuda.
Maipalagip a kalpasan ti naipadamag a timmalaw iti Senado ni dela Rosa iti parbangon idi Mayo 14, sumagmamano nga oras kalpasan ti napasamak a pammaltog iti premises ti Senado ket saan daytoyen a nagpakita pay iti publiko.
Iti agdama, agtultuloy ti nationwide manhunt ken ni dela Rosa.
