LAOAG CITY – Nangbukel ti tracking teams ti National Bureau of Investigation (NBI) para iti pannakaipatungpal ti arrest warrant manipud iti International Criminal Court (ICC) kontra ken ni Sen. Ronald “Bato” dela Rosa.
Segun ken ni NBI Director Melvin Matibag, tututukan iti agdama dagiti otoridad ti tallo a possible a lokasyon a mabalin a paglemlemmengan ti nasao a senador.
Nupay kasta, saan pay a sigurado no kaano nga iyuswat ti possible a pannakaarestar ni dela Rosa gapu ta agtultuloy paylaeng ti operasyon ken intelligence gathering.
Inbatad ni Matibag a nagkiddaw da metten ti tulong iti dadduma pay nga ahensya ken personalidad iti intelligence network tapno ad-adda pay a mapapigsa ti monitoring iti kaso.
Inrakurak pay ti NBI chief nga isagana da a dagus ti tracker teams kalpasan a nangiparuk-at ti pammilin ti Department of Justice (DOJ) tapno ipatungpal ti aniaman a pammilin ti ICC.
