LAOAG CITY – Kinumpirmaran ni National Bureau of Investigation (NBI) Director Melvin Matibag a nangiparuk-at ti subpoena ti ahensia kontra iti sumagmamano a personalidad mainaig iti imbestigasion iti napasamak a pammaltog iti Senado ken iti panaglibas ni Sen. Ronald “Bato” dela Rosa.
Karaman iti pinaayaban ti National Bureau of Investigation ni suspended Senate Sergeant-at-Arms Mao Aplasca, Pasay City Chief of police Joselito De Sesto, Deputy Chief of Staff ni Sen. Robin Padilla a ni Jean Robles ken ti uliteg ti Senador a ni Virgilio Carino.
Inbatad ni Matibag a napateg a maimbestigaran ti papel dagiti nasao nga indibidual tapno maammoan ti posible a panagkurang iti seguridad ken no adda ti pagsungsungbatan iti insidente.
Basar iti National Bureau of Investigation, gagem dagiti subpoena a makaala ti nalawag a testimonia ken ebidensia a makatulong iti panangbukel ti naiget a report mainaig iti napasamak a riribok.
Kuna ti ahensia a ti Senate shooting incident ket nangitunda ti panagdanag iti publiko ken nangilukat ti maipapan iti kinasagana ti security forces iti uneg ti nailian a lehislatura.
Iti agdama, agtultuloy ti imbestigasion ti National Bureau of Investigation ken inpasigurado ni Matibag nga awan ti asioman ti makalasat iti pagsungsungbatan no mapaneknekan nga adda ti pannakabaybay-a wenno pannakairaman iti insidente.
Dinakamat ti ahensia a ti resulta ti imbestigasion ket isubmitir iti Department of Justice para iti maiyannatop a tignay kontra kadagiti makita nga adda ti pagsungsungbatanna.
