LAOAG CITY – Rumrummuar a nakita ti kangrunaan nga akusado kadagiti mapukpukaw a mammallot a ni Atong Ang idiay Cavite idi bulan ti Abril.
Inbatad ni Interior and Local Government Secretary Jonvic Remulla nga idi nakadanon kenkuana ti impormasion a nakita ni Ang iti maysa a lugar idiay Cavite iti napalabas a bulan ket insigida a nangbukel isuna ti tracker team.
Kunana a tapno masigurado nga awan ti makaiparuk-at ti impormasion ket temporario a kinumpiskar dagiti cellphone dagiti miembro ti raiding team.
Nupay kasta, inlawlawagna nga iti baet ti napaspas nga operasion ket nakalibas latta ni Ang.
Inpakaammona nga agal-alisto ni Ang ken maipagarup nga inbatina pay ti kankanenna a taraon.
Inpettengna a nakadawyanen ni Ang nga agtalinaed laeng iti maysa a lugar iti uneg ti dua nga aldaw sakbay nga umakar manen ti lokasion.
Maipalagip nga iti napalabas a dua a lawas ket nakita met ni Atong Ang iti CALABARZON.
Innayon ti sekretario a saanna nga ipalubos a saan a maarestar ni Ang.
