LAOAG CITY – Plano ti National Food Authority (NFA) nga ipangato ti presyo dagiti gatangen nga irik ti ahensya tapno matulungan dagiti lokal a mannalon a maipangato ti mapastrek da.
Segun ken ni Department of Agriculture (DA) Agriculture Secretary Francisco Tiu Laurel Jr., target ti National Food Authority a gatangen ti wet palay iti presyo a P22 ti kada kilo idinto a ti dry palay ket P27 ti kada kilo apaman a mangrugi ti panagapit.
Inlawlawag ni Laurel a ti pannakaipangato ti presyo ti irik ket maliklikan ti pannakalugi dagiti local producers iti baet ti nangato a gastos iti panagtalon ken ti kinangina ti abono.
Mainaig iti daytoy, inbatad ni National Food Authority administrator Larry Lacson nga ad-adda pay nga agbalin nga agresibo ti ahensya iti panaggatang ti irik iti umay a panaggaapit.
