LAOAG CITY – Inrakurak ni Sangguniang Panlungsod Member Bismark Quidang iti siudad ti Batac nga adda ti maiyuswat a programa babaen ti maysa a Non-Government Organization a Teach for the Philippines para kadagiti ubbing a marigatan nga agbasa iti nadakamat a siudad.
Segun kenkuana, adda ti naipadanon nga impormasion kadakuada nga adda dagiti Grade 5 ken Grade 6 pupils a marigatanda nga agbasa.
Gapu iti daytoy, mamati ni Quidang a dakkel a tulong daytoy para kadagiti ubbing pakairamanan dagiti nagannak kadakuada tapno maisuro kadakuada dagiti nagduduma nga istilo iti panagbasa.
Inbatadna a gapu ta nagbalin a ballaigi ti immuna a partnership-da ket maitultuloy daytoy a programa iti Catalino Acosta Memorial Elementary School, Baligat Elementary School ken City of Batac National High School – Poblacion Campus babaen ti panangarisit ti Schools Division Office iti siudad ti Batac.
Inlawlawagna a ti monetary counterpart koma ti lokal a gobierno iti nasao a siudad ket 2 a milyon a pisos iti tunggal pagadalan ngem babaen ti Teach for the Philippines ket awan ti monetary counterpart ti lokal a gobierno.
Kunana a nakasarita payen ti Teach for the Philippines ti Provincial Government of Ilocos Norte para iti pannakailawa pay ti nasao a programa.
Innayonna nga adda ti listaan dagiti ubbing a maisuro nga ad-adda nga agkasapulan ti tulong ken panangbayabay.
