LAOAG CITY – Maysa a North Korean defector ti agpila ti civil ken criminal charges idiay Seoul kontra ken ni Leader Kim Jong Un gapu kadagiti panagabuso a sinango na kabayatan ti pannakaibalud na iti nadakamat a pagilian.
Maipalagip a ni Choi Min-kyung ket naglibas manipod iti North Korea ken nagrurong iti China idi 1997 ngem napwersa a naisubli iti komunista a pagilian idi 2008.
Inpetteng na a sekswal a naabuso ken naparparigat kalpasan ti panagsubli na.
Nupay kasta, idi 2012 ket nakalibas manen ni Choi manipod iti North Korea ken napan nagnaed iti South Korea.
Inpalgak na a ti psychological trauma a pinasar na manipod iti ibilang na a dakkel a pannubok iti biagna ket nagtalinaed ken agtultuloy paylaeng ti panagpaagas na.
Basar iti South-based rights group, no maipila ni Choi ti reklamo ket isuna ti kaunaan a North Korean-born defector a nagpila ti reklamo kontra iti rehimen ni Kim Jong Un.
Inpakaammo met ti Database Center for North Korean Human Rights a plano pay a maiyuli ti kaso ni Choi iti United Nations ken iti International Criminal Court.
