LAOAG CITY – Agsagsaganan ti Office of Civil Defense (OCD) iti posible nga epekto ti napigsa a Southwest Monsoon wenno Habagat, pakairamanan ti mabanbantayan a tallo a bagyo nga adda iti ruar ti Philippine Area of Responsibility (PAR).
Nangisayangkat ti ahensia ti Pre-Disaster Risk Assessment (PDRA) ken dagiti nagduduma nga ahensia ti gobierno ken dagiti lokal a gobierno kas panagsagana iti manamnama a nadakes a panawen.
Basar iti Office of Civil Defense Assistant Secretary Bernardo Rafaelito Alejandro IV nga maabalin a mangrugi ti monsoon rains ita nga aldaw ti Lunes, Agosto 24 wenno Martes ken agtuloy agingga Huebes wenno Biernes.
Possible pay a mangitunda daytoy dagiti panaglayus, panagregaay ti daga, panagngato ti danum kadagiti karayan ken makaapektar iti transportasion ken agrikultura.
Gapu iti daytoy, pinaiget ti ahensia ti koordinasion kadagiti ahensia ken local government unit mainaig iti posible a maapektaran ti tallo a weather system.
Kabayatanna, inpasiguradoda a nakasaganan dagiti response team-da, dadduma pay a relief supplies para iti insigida a panagresponde kadagiti posible nga insidente.
