LAOAG CITY – Naiget ti panagmonmonitor ti Office of the Civil Defense- Region I mainaig iti iduduprak ti bagyo Paolo.
Daytoy ti inbatad ni Mr. Freddie Evangelista, ti Information Officer II ti Office of the Civil Defense iti Rehiyon Uno.
Segun ken ni Evangelista, addan dagiti sumagmamano a pamilya a naipadalan iti preemptive evacuation iti probinsya ti La Union, Ilocos Sur ken iti probinsya ti Pangasinan.
Mainaig iti daytoy, maragsakan ni Evangelista gapu ta aliston nga agtungpal dagiti umili no maibilin ti panagbakwit tunggal adda ti mapasaran a bagyo gapu ta ammo da a ti kasukat ti panagbalin a natangken ti ulo ket saan a nasayaat a pasamak.
Kabayatanna, inpasigurado ni Evangelista a naurnus met dagiti evacuations centers iti intero a rehiyon Uno ken ado dagiti nakasagana a maipaay a tulong para kadagiti maapektaran ti bagyo Paolo.
