LAOAG CITY – Ginutigot ti Office of Civil Defense dagiti residente ti Metro Manila nga agisuot ti face mask no rummuar iti pagtaengan kabayatan nga agtultuloy a kumarkaro ti air quality idiay Manila.
Basar iti National Disaster Risk Reduction and Management Council, partikular a naabisoan dagiti vulnerable group kas kadagiti addaan ti respiratory condition, dagiti ubbing, dagiti natataengan ken dagiti masikog nga agannad.
Nabalakadan dagiti residente a pagtalinaeden a nakarikep dagiti tawa, uminum ti umdas a danum ken insigida nga agpakonsultar no makapasar ti panagrigat iti panaganges.
Naiparuk-at ti ballaag kabayatan a mabalbalkot ti napuskol nga asok iti sumagmamano a paset ti Metro Manila kagiddan ti dakkel nga uram iti Navotas Sanitary Landfill.
Immunan a nagballaag ni infectious disease expert Dr. Rontgene Solante a ti nabayag nga exposure iti smog ken narugit nga angin ket mabalin a mangitunda ti narigat a panaganges pakairamanan ti chemical pneumonia gapu iti toxic air pollutants.
