LAOAG CITY – Binilin ti gobierno ti Delhi, India dagiti pagadalan ti panagakarda iti online class gapu iti narisgo a kalidad ti angin.
Malaksid iti daytoy, magutgutigot pay dagiti mangmangged ti temporario a panagtrabahoda iti uneg ti pagtaenganda.
Mainaig iti daytoy, maysa kadagiti pakadanagan ti gobierno ti nasao a pagilian ti manamnama a pannakaselebrar ti Diwali, maysa a Hindu festival of lights a tinawen a maselselebraran idiay India.
Masansan a mangiwaywayat dagiti residente ti panagpaputok iti nasao a piesta, no sadinno a pakaroenna ti polusion iti angin.
Kabayatanna, basar iti inparuk-at a datos ti Central Pollution Control Board ti nasao a pagilian, nairekord ti Air Quality Index (AQI) a 382 idiay Delhi idi naudi a lawas.
