LAOAG CITY – Nairekord manen ti narugit a kalidad ti angin iti sumagmamano a paset ti Metro Manila basar iti Department of Environment and Natural Resources (DENR).
Basar iti monitoring of concentrations ti Particulate Matter 2.5 (PM2.5) ti DENR-Environmental Management Bureau, nairekord ti air quality index a 189 nga ikonkonsiderar nga “unhealthy,” idiay Punturin, Valenzuela City.
Nairekord met ti narugit nga angin iti monitoring stations iti Commonwealth Avenue ken iti uneg ti Ateneo de Manila University campus idiay Quezon City pakairamanan iti Marikina City, Malabon City ken Caloocan City.
Agpada nga air quality ti nairekord kadagiti nadakamat a lugar.
Naiballaag a dagitoy a particles ket kabaelanna a sumrek iti nauneg a paset iti bara ken sumrek iti pagtarayan ti dara a mangitunda ti nagduduma a klase ti sakit.
