LAOAG CITY – Nairekord ti ‘very unhealthy’ a lebel ti de kalidad ti angin iti sumagmamano a paset ti Metro Manila idi Setiembre 30 gapu iti agtultuloy a transboundary haze a posible nga adda pakainaiganna iti napasamak nga uras iti Indonesia.
Basar iti Environmental Management Bureau (EMB) ti Department of Environment and Natural Resources (DENR), nakita ti nangato a lebel ti pure particulate matter nga adda rukodna a 2.5 micrometers iti sumagmamano a paset ti National Capital Region (NCR).
Pakairamanan dagiti lugar a nakairekord nga adda “very unhealthy” a lebel ti de kalidad ti angin ket ti Caloocan (University of the East), Las Piñas, Muntinlupa (Parang), Muntinlupa (Filinvest City), Parañaque (Don Bosco) ken Parañaque.
Nupay kasta, nakairekord dagiti suidad ti Mandaluyong, Manila, Marikina (Parang), Navotas, Pasay, Pateros, Quezon City (Ateneo), San Juan City, Taguig (Technological University of the Philippines or TUP) ken Valenzuela ti Air Quality Indez nga adda iti baet ti 101 ken 150 a pakairamanan iti lebel a saan a natalged nga angin aglalo kadagiti ubbing, masikog ken dagiti senior citizen.
Kabayatanna, binalakadan ti Department of Environment and Natural Resources – Environmental Management Bureau ti publiko a limitaran dagiti aktibidad iti ruar ken agsuot ti mask kas ti N95.
