LAOAG CITY – Inpetteng ni Kamanggagawa Party-list Representative Elijah “Eli” San Fernando a maikanniwas iti paglintegan ken labor code ti inparuk-at nga status quo ante order wenno panangsuspenso ti Pasig City Regional Trial Court (RTC) iti ₱85 a nayon a sueldo para kadagiti mangmangged iti National Capital Region (NCR).
Inbatad ni San Fernando a nalawag a nakasurat iti Article 126 nga awan ti nasken a preliminary wenno permanent injunction wenno temporary restraining order ti mabalin nga iparuk-at ti Korte ken aniaman nga entity iti aniaman a proseso iti Commission wenno Regional Boards.
Dinakamat ni San Fernando ti Article 123 ti Labor Code nga aniaman nga apela mainaig iti wage order ket nasken a dumalan iti National Wages and Productivity Commission ti Department of Labor and Employment (DOLE) isu nga awan ti hurisdiksion ditoy ti Pasig RTC.
Inlawlawagna a barya laeng ti ₱85 a nayon a sueldo iti National Capital Region a tenna-tennagan pay a maipaay ken ita ket sinuspenso pay imbes a makatulong koma kadagiti mangmangged.
Madanagan ni San Fernando nga imbes nga ilaban ni Labor Secretary Francis Tolentino ti bassit a nayon a sueldo ket sursurotenna met ti iligal ken awan ti pagibasaran a TRO ti Pasig RTC.
