LAOAG CITY – Nagsusik ni Kamanggagawa Party-list Representative Elijah “Eli” San Fernando ken Department of Labor and Employment (DOLE) Secretary Francis Tolentino iti tengnga ti deliberasion para iti gakat a 2027 budget ti ahensia.
Namungay daytoy iti isyu ti naitantan a panangipatungpal ti nayon ti sueldo para kadagiti minimum wage earner iti National Capital Region wenno NCR.
Inbatad ni San Fernando a basar iti Order ti Pasig Regional Trial Court (RTC) Branch 152 nga agbalin laeng nga epektibo ti writ of preliminary injuction no mangidasar ti 10-B bond dagiti petitioner.
Inpettengna a gapu ta awan pay naisagana a bond dagiti kompania ket awan pay agdama a naikeddeng a legal injuction isu nga awan legal a rason ti Department of Labor and Employment (DOLE) tapno lappedan ti panagngato ti sueldo.
Inpaganetget pay ni Rep. Eli a basar iti Republic Act No. 6727 wenno Wage Rationalization Act, ti Regional Tripartite Wages and Productivity Boards (RTWPB) ti adda eklusibo a turay iti panangipatungpal ti sueldo. Kunana pay a nalawag a maipawil iti babaen ti nadakamat a linted ti panangipatungpal ti injuction dagiti gagangay a korte kontra iti decision ti wage board.
Kas sungbat, dinepensaan ni Sec. Tolentino a ti panangsupensar ti panagngato ti sueldo ket saan a decision ti Department of Labor and Employment (DOLE) no diket panang-comply ken panangrespetar laeng ti naituding a proseso ti linteg.
Kunana a ti Korte Suprema laeng ti adda bilegna nga agdesision mainaig iti legalidadna daytoy ken inton oras a mangiparuk-at ti Korte Suprema ti bilin nga ipatungpal ti increase ket insigida a suroten ti ahensia.
Innayon pay ni Tolentino a maawatan ti Department of Labor and Employment (DOLE) ti kasapulan dagiti mangmangged a Pilipino a makaawat ti ad-adda a nangato a sueldo kabayatan ti agtultuloy a panagngina ti presio dagiti magatang ken rumbeng laeng a maipaayan dagiti mangmangged ti kanayonan a sueldo a karbengan a para kadagitoy.
Inlawlawagna nga nangipila ti ahensia iti babaen ti Office of the Solicitor General (OSG) ti legal a petision tapno kwestionaran ti Regional Trial Court order.
Malaksid iti daytoy, supsuportaran ti ahensia ti agsina a naipila dagiti grupo ti mangmangged pakairamanan ti Kamanggagawa Party-list iti Korte Suprema tapno lappedan ti Regional Trial Court (RTC) iti panangkanselar iti wage order.
Kabayatanna, inpaganetget ni San Fernando nga awan karbengan ti Department of Labor and Employment (DOLE) nga agkiddaw iti pondo para iti tawen 2027 no saanna kabaelan ti mangdepensar ti karbengan dagiti mangmangged isu nga insingasingna nga i-defer wenno itantan ti budget ti ahensia.
Nupay kasta, saan a naaprubaran ti nadakamat a petision kalpasan a nakagun-od laeng ti 7 ti umanamong a botos kontra iti 31 a botos a nagkontra iti daytoy.
