LAOAG CITY – Nangiparuk-at ti sumagmamano a siudad iti National Capital Region (NCR) nga agisuot ti face mask dagiti residente kalpasan a nairekord ti “unhealthy” agingga “very unhealthy” a kalidad ti angin iti sumagmamano a lugar.
Iti Manila, inrakurak ti city government a ti air quality iti sumagmamano a lugar kas ti Anda Circle, San Sebastian Residences ken Sta. Ana Hospital ket “unhealthy for sensitive groups,” idinto a ti Puregold Tayuman ket umabot iti “very unhealthy” level.
Gapu iti daytoy, nabalakadan ti publiko nangruna iti aglawlaw ti Puregold Tayuman a liklikan ti panagruar no saan a kasapulan ken agisuot ti face mask.
Magutgutigot dagiti ubbing, natataengan, masikog ken addaan ti sakit iti panaganges kas ti angkit nga agtalinaed iti uneg ti pagtaengan.
Iti Quezon City, inbatad ti lokal a gobierno nga agtaltalinaed nga “unhealthy” agingga “very unhealthy” ti angin basar iti Air Quality Index (AQI).
Basar kadakuada, mabalin a gapu daytoy iti asok manipud iti uram ti Navotas Landfill ken nangpakaro pay ti thermal inversion.
