LAOAG CITY – Umanamong ni Mrs. Erlinda Agustin, mangidadaulo ti Office of the Senior Citizens Affairs ditoy siudad ti Laoag iti pannakasuspenso ti bussiness permit dagiti botika ken pagtagilakoan a saan a mangted ti diskuento kadagiti senior citizen no awan ti maipakita a purchase booklet dagitoy.
Segun ken ni Agustin, masapol a sumurot dagiti botika wenno establishimento kadagiti pagalagadan nangruna no para kadagiti senior citizen.
Inbatadna a nabayagen a pammilin ti Department of Health daytoy a saanen a kasapulan ti booklet tapno maipaayan ti diskuento dagiti senior citizen a gumatgatang ti agasna.
Inbatadna a babaen iti daytoy ket mabuteng dagiti botika ken pagtagilakoan a saan a sumurot iti pagalagadan.
Inlawlawagna a senior citizen ID wenno reseta laengen ti doktor ti kasapulan nga ipakita no mapan gumatang ti agas kadagiti botika wenno pagtagilakoan.
Immuna iti daytoy, inlungalong ni House Deputy Majority Leader ken ACT-CIS Party-list Representative Erwin Tulfo a masuspenso ti business permit ti botika wenno dagiti pagtagilakoan gapu ta adda dagiti report nga adu pay laeng kadagiti establishimento ti agbirbirok ti discount booklet manipud kadagiti senior citizen ken adda dagiti dadduma nga aglaklako a maipagarup a mangunget pay kadagitoy.
