LAOAG CITY – Isagsaganan ti Office of the Ombudsman ti panangiwayat ti naun-uneg a panangtingiting mainaig iti naiturn-over a computer ken dokumento ti pimmusay a Department of Public Works and Highways Usec. Catalina Cabral.
Inbatad ni Assistant Ombudsman Atty. Mico F. Clavano, maipadalan iti ‘digital forensic examination’ ti Central Processing Unit wenno C.P.U. a ramit ti dati nga opisial.
Daytoy ket kalpasan nga insigida nga inturn-over ti Department of Public Works and Highways iti Office of the Ombudsman dagiti dokumento ken computer a dati nga iggem ti natay nga Undersecretary.
Daytoy ket maiyataday iti panangiyisyu ti opisina ti ahensia ti ‘subpoena duces tecum’ a mangibilbilin tapno i-produce dagiti nasao a kagamitan.
Inpasigurado ti Office of the Ombudsman nga agbalin a nakalukat wenno ‘transparent’ ti iwayat a panangtingiting.
Kabinnuligda ti Commission on Audit, Department of Public Works and Highways ken Philippine National Police Anti-Cybercrime Group tapno maipasigurado ti intergridad iti iwayatda a proseso wenno ‘digital forensic examination’ ti Central Processing Unit ni Cabral.
Ikonkonsiderar daytoy ti Ombudsman kas ‘critical development’ nangruna iti imbestigasion tapno maipresentar mismo ti orihinal nga ebidensia.
Mamati ti Ombudsman a ti mapagtalkan a nangrugian ti ebidensia ket manipud iti ahensia ti gobierno ken indibidual nga akin-iggem mismo daytoy.
