LAOAG CITY – Isayangkat manen ti Pugad Lawin ti Operation Tuli iti Laoag City General Hospital inton Sabado, Mayo 23.
Segun ken ni Mr. Jeoffrey Martin Aplacador, Chapter President ti Pugad Lawin, target-da nga akomodaren ti agarup 100 nga ubbing tapno maka-avail dagitoy ti libre a kugit.
Inbatadna a mangrugi daytoy nga aktibidad iti oras ti alas otso ti bigat agingga iti oras ti alas tres ti malem ngem nakadepende ti kaadu dagiti pasiente a makipaset iti Operation Tuli.
Inlawlawagna a tinawen daytoy nga isaysayangkat ti Pugad Lawin tapno matulunganda dagiti nagannak iti gastosenda iti panagpakugit dagiti annakda.
Kunana a naiget ti pannakikoordinarda ken ni Mayor James Bryan Alcid, Ilocos Norte Medical Society nga idadauluan ni Dr. Lavni Magpily, Mariano Marcos State University – College of Health Sciences ken Mariano Marcos Memorial Hospital and Medical Center para iti pannakaipursige ti nasao nga aktibidad.
Innayonna a daytoy ti maikadua a daras ita a tawen ti pannakaisayangkat ti Operation Tuli no sadinno a ti naudi ket iti ili ti Badoc nga adda ti 92 ti balligi a nakugit.
Kabayatanna, inpakaammo ni Mr. Aplacador a kalikagum ti Marine Battalion a makikammayet kadakuada para iti sabali manen a pannakaisayangkat ti Operation Tuli.
