LAOAG CITY – Nagbalin nga emosyonal ni Barangay Kagawad Lenilda Raguindin iti Barangay Gaang iti ili ti Currimao kabayatan ti panangistorya na ditoy Bombo Radyo Laoag ti maipagarop a panagsasao kadakuada ni Doctor Jayson Ranada.
Ni Barangay Kagawad Raguindin ket lola ti ubing a naopera ti ulo na iti Ranada General Hospital ditoy ciudad ti Laoag.
Immunan a nagpainterview ditoy Bombo Radyo Laoag ti lolo ti ubing a ni Mr. Franklin Raguindin no sadinno nga immapela iti nasao nga ospital a palubusan da koman a rumuar ti apoko na tapno saanen a manayunan ti bill na a nasurok a 254 ribo a pisos.
Iti palawag ti lolo ti ubing, saan a palubusan ti ospital a rumuar ti apoko na agingga a saanda a mabayadan amin ti bill da iti baet a nakisarita da nga in-inutan da koma lattan a bayadan daytoy.
Inpakaammo ni Barangay Kagawad Raguindin nga iti panagsasango da kada Doctor Ranada ket arigna sorbetes da a marunrunaw ti napalalo a bain dan gapu kadagiti maipagarop a saan a nasayaat nga insawsawang kadakuada ti doktor.
Iti baet daytoy, nagyaman ti barangay kagawad gapu ta tinulungan ida ni Doctor Don Ranada nga immasideg ken ni Mr. Ryan Remigio nga isu met ti nangitunda kadakuada ken ni Congressman Sandro Marcos.
Inpakaammo ti barangay official a ti opisina ni Congressman Marcos ti nangbayad ti balanse da iti ospital a nasurok a 100 a ribo a pisos.
Kabayatanna, nangipaay met ti komento ti kagawad a Raguindin mainaig iti naibaga nga us-usaren da ti social media tapno agdawat ti kwarta.
Inpalgak na a napanunot da ti agpatulong iti social media gapu ta awan ammo dan a pangalaan da ti nayun ti pagbayad da iti ospital.
Innayon na nga awan ti makita na a madi iti inaramid da gapu ta gagangay laeng nga aramiden da daytoy gapu iti kinarigat ti panagbiag da.
Mainaig iti daytoy, ginandat ti Bombo Radyo Laoag nga alaen ti kabibiangan ni Doctor Jayson Ranada ngem nagkedked nga agpainterview.
