LAOAG CITY – Kinumpirmaran ni Pol. Lt. Godofredo Ribuyaco, ti deputy chief of police ti PNP-San Nicolas a plano a petisyonan dagiti opisyales ken residente ti Barangay 19 iti nasao nga ili ti menor de edad a suspek iti panagtatakaw ti baka.
Ti manamnama a petisyon ket maipalaon a saanen a mabalin a makastrek iti Barangay 19 nasao a menor de edad.
Segun kenni Ribuyaco, inkari ti step-father ti menor de edad a bagbagaan na daytoy ken no uliten laeng ti barito ti kastoy nga aramid na ket isunan a mismo ti mangipakustudiyar iti maseknan iti biang ti PNP.
Naamoan a ti menor de edad ket adda ti live-in partner na iti Barangay 19, San Nicolas ken tubo isuna iti Barangay Nalbo ditoy ciudad ti Laoag.
Ummuna iti daytoy, naduktalan a ti menor de edad ti nagtakaw kadagiti dua a baka a kukua ni Erlinda Batangan.
Nupay kasta, kalpasan ti panagsasarita dagiti maseknan ken ti menor de edad iti PNP-San Nicolas ket napakawan da ti barito ngem ma-petisyonan tapno saanen a mabalin a sumrek iti Barangay 19.
Maipalagip a ti nasao a menor de edad ti akin-aramid iti panagpukaw dagiti baka iti ili ti San Nicolas ken iti Barangay Nalbo ditoy ciudad ti Laoag itay kallabes.
